УИХ-ын гишүүн, МАН-ын дэргэдэх Нийгмийн Ардчилал-Монголын Оюутны Холбооны Ерөнхийлөгч Д.Гантулга өнгөрсөн хавар буюу 2017 оны 5-р сард иргэн Ч.Наранзаяаг хүчирхийлсэн гэх хэрэгт холбогдсон билээ. Түүнээс хойш Ч.Наранзаяагийн эгч Ч.Саранзаяа хэвлэл мэдээлэл, хуулийн байгууллагад удаа дараа хандаж байв. Энэ бүхний эцэст буюу 2 сарын 22-нд Нийслэлийн прокуророос УИХ-ын гишүүн Д.Гантулгад бусдыг хүчирхийлсэн хэргээр эрүүгийн хэрэг үүсгэж, яллагдагчаар татаад байна. Энэ бүхэнтэй зэрэгцэн УИХ-ын гишүүн Д.Гантулга гишүүний бүрэн эрхээсээ сайн дураараа татгалзахаар шийджээ. Гэхдээ шууд мэдээлэл хийж, шийдвэрээ зарлалгүй өөрийг нь УИХ-д нэр дэвшүүлсэн МАН-ын Удирдах Зөвлөлд хүсэлтээ гаргасан аж.
Тэрбээр өргөдөлдөө “УИХ-ын гишүүний бүрэн эрх саад болоод байгаа бол жирийн иргэн болоод үнэн зөвөөр шалгуулъя” хэмээн бичсэн байна.
Өөрөөр хэлбэл УИХ-ын гишүүн Д.Гантулга бүрэн эрхээсээ татгалзах шийдвэрээ нэгэнт гаргасан бөгөөд одоо эцсийн шийдлийг МАН-ын Удирдах Зөвлөл гаргах ажээ. Хэрэв түүний хүсэлтээрээ чөлөөлөгдөх хүсэлтийг МАН-ын Удирдах Зөвлөл дэмжин, улс төрийн шийдвэр гаргавал асуудал хуулийн дарааллын дагуу шийдэгдэж эхлэх юм.
